Alanka Bestauty

«…æмвынг уыдысты Дауджытимæ Ир!..»

Уататы Бибо | «Гаджидау»

***
Æз нæ уарзын,- лæджы уд куы вæййы æфхæрд,
Хатт хъысмæт дæр куы разыны хивæнд.
Æз нæ уарзын,- куы баззайы хорз лæг æвæд.
Кæнæ хатгай куы фæкæнын зивæг.

Æз нæ уарзын,- куы фæмысынц искæуыл дау,
Уыд æлгъаг мын мæнгдзурæг кæддæрид.
Æз нæ уарзын,- куы фæхæссынц искæмæ фау,
Лæг уал хи удæн исты куы ‘мбарид.

Æз нæ уарзын,- куы разыны зæрдæ къуырма,
Лæг дыууæ хатт куы бахойы дуар дæр.
Æз нæ уарзын,- куы свæййын нæ цардæй хъуырмæ,
Уæд мæ зæрдæ куы нал вæййы мур дæр.

Æз нæ уарзын,- рæстдзинад куы фæкæнынц уæй.
Кæнæ хорзæн куы сæттынц йæ фæндаг.
Æз нæ уарзын,- æдзæмæй куы фæкæсы мæй.
Кæнæ удыл куы бахæцы ‘рхæндæг...

Бестауты Аланæ

***
Искуы куы сфæлмæцай цардæй, мæ хур, -
(Бадар мæ ныхас дæ зæрдыл).
Знæт цæугæдоны ысфæлтæры дур,
Бахсиды ‘фсæйнаг цъæх арты.

Царды цæуæнтæй нæ вæййы æвзæр,
Се ‘ппæтдæр зонд ысты удæн.
Хорз хъуыдытæй, мæ хур, дзаг куы уа сæр, -
Адджын у ахæм уд цардæн.

Ма сфæлмæц а цардæй, курын, мæ хур,
Бахъæц уал хуры ыскастмæ.
Амондыл чи уигъы барвæндæй къух?
Кæс, мæ хур, кæс уал æнхъæлмæ…

Бестауты Аланæ

…махæй рох у -
сыгъзæрин æдзух,
адæм арынц хуымæтæг змисы…🤍

***
«Сæлфынæг цасфæнды хæссæд,
Фæбон кæндзæн йæ рады...»

Зæххыл нæ вæййы алцыдæр рæсугъд:
Сыгъзæрин хур дæр аивы къæвдайæ.
Раст боныхъæдау иваг у дæ уд,
Нырма дæ зæрдæ сонт куы у, зыдтай йæ?

Нæ цард нæ вæййы алыхатт æнцон,
Кæм хæрды, кæм та уырдыджы æруайæм.
У ‘рмæстдæр уымæн зæххы тæф æхцон,
Зындзинæдты дæр чи базоны райын.

Лæг бавзары йæ тыхст царды æппæт,
Къæйдурау маст лæджы уды ныббады.
Фæлæ сæлфынæг цас фæнды хæссæд,
Фæбон кæндзæн æнæмæнг, зон, йæ рады.

Æмхуызонæй дæ царды уаргъ фæхæсс,
Фæрдгуытæ сты, зындзинæдтæ ‘мæ цинтæ.
Куы ‘ххæст кæнай ныфсджынæй ды дæ хæс,
Дæ ном дзурдзысты уый фæстæ дын минтæ...

Бестауты Аланæ

Хъуамæ дæ уарзон идеалтыл рыг абадын ма уадзай, афтæмæй цæуай раст фæндагыл æмæ дæм хъуамæ кæддæриддæр уа уыйбæрц намыс æмæ æхсæнадон лæгдзинад, цæмæй рæстдзинад сдзурын фæразай: ома – хæрамы  хæрам рахонын, хæрзиуæджы – хæрзиуæг, давæджы – давæг, налат лæджы – налат».🤍✍🏻

🔥«КАВКАЗ»🔥

Муз. Таймураз Дзускаев
Сл. Алана Бестаева

СУСÆГ КУЫВД

Цы фæкуры йæ сусæг куывды лæг?
Куы ‘рызгъорынц йæ хус рустыл цæссыгтæ...
Куы ныббады ныфссаст зæрдæйы сæг,
Куы бацъынд кæны донæйдзаг цæстытæ...

Цы фæкуры йæ сусæг куывды лæг?
Куы нал фæцæуы риуы арфы зæрдæ...
Куы свæййы уд цæугæдонау сыгъдæг,
Цы фæкуры? Цæуыл вæййы йæ лæгъстæ?..

Нæ зонын æз, йæ сусæг куывды лæг,
Цы фæкуры фæсус хъæлæсæй, хъавгæ.
Фæлæ Хуыцау у хорзæхтæ дæттæг,
Ныккæса, уадз, дæ зæрдæмæ уый тавгæ...

Мæ сусæг куывд мын фехъусæд Хуыцау,
Лæууын йæ разы удсыгъдæг, æргомæй...
Мыййаг ды дæр кæд а изæр мæнау,
Дæ сусæг куывды ард хæрыс - кæй номæй?..

Бестауты Аланæ