Helfen Sie mir, Deutsch zu lernen

مجموعة A1، مؤلفة من 710 بطاقة، أكثر من كافية لتجاوز A1

حذفت مجموعات الأنكي السابقة، المجموعات الحالية أفضل وأشمل وأوسع✌🤞

♥️ القراءة: القراءة من أهم الأشياء اللي لازم تعملها على كامل مسيرة تعلمك اللغة وحتى بعدها، ومن A1 وحتى B1 وأكثر. بالقراءة بتشوف القواعد اللي درستها عم تتطبق قدامك، بتراجع الكلمات اللي حفظتها، وبتتعرف على كلمات جديدة، وبتتدرب على اللفظ والنطق وبتتعرف بالأخير على التراكيب الألمانية المميزة. شغلة أخرى، أي شخص درس منAnki بعاني تماما من قصة نسيان الكلمات سواء أفعال أو أسماء بعد الحفظ. هي المشكلة ما بتنحل إلا بالقراءة، لأنو الكلمة بتكرر معك طول الوقت أثناء القراءة. أنكي والقراءة بيمشو إيد بإيد، وجهدك ضائع إذا بتفصلن عن بعض. ضمن A1 أنا اعتمدت على تطبيقBeelinguapp وكان جدا ممتاز بالنصوص السهلة والترجمة المتوفرة. بال A2 اعتمدت على موقع
https://www.deutsch-to-go.de/
مقالاتو جدا قصيرة وحلوة وبتجي مع نص سماعي وأسئلة بنهاية المقال، حتى ضمن B1 قرأت منو كتيير مقالات ولكن أيضا قرأت روايتين قصيرات
Der Kleine Prinz
Die Schule der magischen Tiere.
بالبداية كانت قراءة الرواية صعبة، بس كنت أقرأ صفحة وحدة باليوم ومجرد ما حس حالي تبعت وقف، ومع مرور الوقت والاستمرارية كل ما حس حالي أريح زيد الصفحات، حتى وصلت أني أقرأ 25 بنصف ساعة

♥️ الكتابة: ابتداء من A2 انطلقت بكتابة مذكراتي بنهاية اليوم باللغة الألمانية وبجمل بسيطة بدون تكلف، بالبداية كان الأمر صعب وما أعرف كيف أكتب ولكن جبرت نفسي على أني عبر عن فكرتين صاروا معي ضمن اليوم وعن شيء أنا سعيد فيه وشيء آخر أنا مشتوق إلو بالمستقبل. المهم أكتب جمل وأفكار وليس نص أو مقال. أثناء تحضير نماذج B1 كتبت مواضيعي بإيدي وعبرت عن أفكاري لحالي، وكنت أطلب منChatgpt يصلح المواضيع. الفكرة اللي لازم تعرفها أنوChatgpt ما بيعرف شيء اسمو مستوى كافي وجيد. أي موضوع كنت أعطيه ياه كان دائما يعطيني نسخة أحسن منو، ببعض الأحيان حسسني هادا الشيء بالاحباط والتشاؤم، لكن بعد فترة صرت أطلب منو فقط يصحح الأخطاء القواعدية والتراكيب وما يغير الأفعال والكلمات اللي أنا استخدمتها. أنا بدون Chatgpt ما كنت لجيب 85، بالإضافة لأنو وفر عليي كلفة مادية بدون ما أطلب من أي حدا يصحح أي شيء. ما بقدر أتخيل شخص ما يستخدم Chatgpt بعد هلق.

♥️ السماعي: اهتممت بالسماعي منيح ولكن مو متل القراءة والكتابة، ومرت عليي فترات منيحة أقطع بدون ما أسمع شيء. اتفرجت على مسلسل Stragner Things بالألماني من موقع http://S.to/ بدونUntertitel واتفرجت على سلسلة Harry Potter وأفلام أخرى بالألماني من مستوى A2، ولعبت سلسلة Assassin's Creed بالدبلجة الألمانية وكانت جدا ممتعة وسمعت كتير أغاني وبودكاست ويوتيوب. بكلشي ذكرتو كان في كتيير شغلات ما أفهمها ولكن كنت استمر. الانقطاع الكثير والطويل هوي الشيء اللي بندم عليه، كان لازم كل يوم وكل يوم أسمع.

♥️ المحادثة: أقل شيء اتدربت عليه بكامل تعلم السنة ونصف، وما اتدربت عليه بقوة وكثافة لحد 20 يوم قبل الامتحان. كانت الأفكار تجي على بالي بسهولة وأعرف عبر عنها بسبب الكتابة والقراءة ولكن كنت أخطىء بالقواعد كتيير وأنسى طبقهن أثناء الحديث، بالإضافة لأني نسيت طبق أشياء أساسية بقسم المحادثة بالامتحان مثل الاعتراض على فكرة بال Gemeinsam أو استخدام قواعد ال B1 وأدوات الربط بين الجمل، وهذا هوي السبب ليش خسرت علامات منيح فيه. انا ما عطيت المحادثة حقها ووقتها الكامل مثل باقي الاقسام. لا تعمل متلي💔 سجل كورس محادثة خاص، وابدأ بالتحدث وتطبيق القواعد حتى من A2.

بالأخير لسا طريق تعلم اللغة طويل، وعما قريب رح أدخل على B2 وناطرني لسا C1 ورح استمر بنشر أي شيء مساعد بلاقيه. مواضيعي للB1 ومجموعة أنكي جديدة للB1 بتشمل كامل ال Zertifikat رح أنشرها قريبا. جدا سعيد بالمرحلة اللي وصلتها، في كتير فترات مرت عليي ما كنت بعتقد أني رح وصل، وجدا فخور بالقناة وبالطريق اللي قطعته معي من البداية، وشكرا لكل حدا موجود هون وانشالله دائما بقدم اللي فيه خير.
اذا في أي سؤال بتعرفوا وين تحكوني😊
بالتوفيق ❤️

🤞أنا درست ال A1 و A2 ضمن كورس خاص من سلسلة كتبStudio خلال السنة الماضية إلى جانب التحضير للامتحان الطبي الموحد. ركزت بدراستي ضمن هي الفترة على تجميع كل كلمة وفعل وصفة جديدة وإضافتها إلى مجموعة أنكي. هذا الشيء فادني جدا بكتابة المواضيع والقراءة وحتى السماعي والمحادثة فيما بعد، رغم اهتمامي الخفيف بالسماعي والمحادثة مقارنة بالكتابة والقراءة. حفظ كلمات أنكي، رغم الملل والصعوبة اللي بيفرضها، عنصر أساسي لبناء ذخيرة مفردات قوية، تأثيرها بيشمل كل مهارات اللغة. الشيء الأساسي اللي ركزت اهتمامي عليه أيضا ضمن هي الفترة هوي عدم الانقطاع عن اللغة فترة طويلة مهما كان السبب، لأنو اللغة بسرعة بتنتسى.

🤞بعد الامتحان الموحد بالشهر العاشر السنة الماضية أجريت مراجعة للA1 و A2 من كتاب قواعد Grammatik Activ ودرست منو قواعدB1. الكتاب جدا ممتاز وعوضني كتير عن قلة التمارين الموجودة بكتبStudio. بعد ما أنهيت Grammatik Activ، اتجهت نحوGrammatik Activ B1+. كنت مفكر الكتاب عبارة عن قواعد إضافية للB1، لكن B1+ كان مراجعة وتلخيص مع تمارين أكثر صعوبة وأهمية للكتاب الأصلي. وأنا حاليا بشوفون كتلة وحدة، اللي بدو يدرس الGrammatik لازم يدرس معوB1+، لأنو رح يستفاد جدا ويرسخ القواعد بقوة.

باستخدام هادا الموقع
http://Poe.com/
فيك تحكي مع برنامج الذكاء الاصطناعي GPT4 وتقوي لغتك الألمانية بالمحادثة او القواعد او كتابة المواضيع (بالمجمل كلشي - أستاذ خصوصي مجاني 24/7)
المميز أنو هادا الموقع مانو بحاجة لا vpn ولا بروكسي ولا رقم دولي ولا بحدد عدد معين من الرسائل وسريع 😀😀
طريقة الشرح بالفيديو👇👇
موفقين ❤

موقع ألماني مختص بالتدرب على مهارة الاستماع يعرض نصوص باللغة الألمانية مع تسجيل صوتي لكل نص، ابتداء من المستوى A2 وحتى المستوى C2 بأكثر من 160 نص للمستوى الواحد
https://www.deutsch-to-go.de/

تطبيق Deutsche Welle المعروف جدا لتعلم اللغة الألمانية ❤❤
مهما كان المستوى الذي أنت فيه، هذا التطبيق سيساعدك، وستجد فيه شيئا تتعلمه
https://play.google.com/store/apps/details?id=com.dw.learngerman

فيديو ممتع عن العلاقة بين اللغة الإنلكيزية والألمانية❤❤
https://youtu.be/VebSZrHmsI4